Tash e sa ditë vendi ynë po vazhdon të dominohet nga kushte të paqëndrueshme atmosferike, të cilat po sjellin vranësira të shpeshta dhe reshje lokale shiu.
Kushte të ngjashme do të na shoqërojnë edhe gjatë kësaj jave, me vranësira të shpeshta e herë pas here edhe me reshje lokale shiu, në momente të caktuara në formë të rrebesheve. Nuk do të mungojnë as intervalet e shkurta me diell.
Sipas parashikimeve të fundit, nga dita e dielë pritet të depërtojë një goditje e fuqishme polare, duke sjellë ulje të theksueshme të temperaturave dhe reshje bore edhe në zona të ulëta.
Era do të fryjë kryesisht nga drejtimi i veriut, e cila kohë pas kohe pritet të jetë mjaft e fuqishme, me shpejtësi prej 15-55 km/h!
Temperaturat do të mbesin pak a shumë rreth vlerave mesatare për këtë periudhë kohore, ndërsa të dielen do të pësojnë ulje të theksueshme. Minimalet këtë javë do të lëvizin prej 4 deri në 8°C, ndërsa ato maksimale prej 5 deri në 17°C. /MeteoKosova/
English 
Albanian